港版唐吉訶德當然無真正的唐吉訶德理想主義得近乎瘋癲，他們一個又一個是夢想的萎縮狀，實際到計算到恐懼到近乎瘋癲，愈縮就愈渺小，人生都滑晒啞，這也是你我他她香港人非常本土的「危機」寫照。但，當一樣地踏上遠征的路途，一樣地插科打諢，笑料百出，當揚帆出海終於肯跳出了Comfort Zone，命題殊途同歸，不是教你人要有夢想否則同條鹹魚無分別──而是去做、去實踐，永遠比空想夢想來得有生命力。你會想到荷索的《陸上行舟》，至少你親眼見過那些絕美風光，不枉此生⋯⋯而港版唐吉訶德亦即是夕陽戰士，由一眾演藝學院畢業的同門師兄弟，馮志佑、鄧智堅、張銘耀和邱頌偉擔正，大師兄黃秋生則戲謔自己的角色是做骨灰龕（他演已過身的老師）。成立五年的「神戲劇場」首個原創舞台劇《夕陽戰士》，來自黃秋生十年前清晨做的一個夢⋯⋯
1
我的保釣夢也隨時代過去而終止
夢當然糊掉了，但秋生一起身就生出個念頭：「如果某日四個老鬼走去保護釣魚台，做同一件事但各有觀點，荒謬絕倫，都幾鬼好笑。」最初一望到《夕陽戰士》故事大綱，保·釣二字非常富有黃秋生記印，他芸芸眾多傳奇故事中的一記亮點，21年前兒子出世不夠兩個月，他就連條命仔都唔要，登陸·釣·魚·台說要趕上見證歷史的那班車，今天再次出現在秋生有份編劇的《夕陽戰士》，你以為那是明志之作。
「係我哋嘅年代，登陸釣魚台係一件好勁嘅事，好多人宜家唔識歷史，無民族情感，完全唔知道，所以點解我要講⋯⋯但呢次應該係我最後一次講中國人嘅身份，講埋呢次我做返個鬼佬，件事完咗，因為係時候啦。」一開始聽秋生說這兩句，你以為你明白話語裡頭的失望透頂，來到愛國變成需要自我證明、立法強迫你的年頭，秋生頭頂不知有多少個「港獨」、「漢奸」，連「藏獨」、「疆獨」也有份的名號，難免心灰意冷，但另一半沒猜對，秋生說的是「直情係絕望」，那種情緒更是對應終將逝去的年代。
「我個年代過去咗囉，而果個年代唔會再重嚟，我哋嘅信念，做人處事嘅法則已經失去咗。」
但秋生的絕望或失望永遠有種慍怒：「包括你而家見到有後生仔講，·陸·肆·唔關我事，我哋果個年代唔會咁講，因為好有牽連，唔關你事？咁你講唔講廣東話？廣東話邊度嚟？你嘅生活習慣點樣嚟？你飲熱水定凍水？叫你日日飲奶食芝士你會唔會痾？ DNA嘅嘢你無得搞。當你生活習慣、語言，文化各方面都代表你係華人，你點可以否認自己係中國人？」
「意識形態一唔同，就成個世界唔同咗，以前果種道德倫理也唔同啦！以前我哋要忠孝仁義，中國嘅思想已經無咗，我係好傳統嘅中國人家庭長大，細個亦要讀家訓，《三字經》，宜家點同？果個自己瓜咗㗎啦，所以今次係我最後一次明志。」秋生一開始聲明，《夕陽戰士》一點也不政治，只藉釣魚台講更永恆的題旨，而那個題旨更是逆行時代的價值觀，而他說的「明志」同樣有著兩層意思，藉著四個夕陽戰士所面對的處理講理念，明「愛國」的志，還有明「逝去美好時代價值」的志。
「宜家係一個冷漠嘅年代，國家唔關我事，家庭唔關我事，女朋友唔關我事。《夕陽戰士》我就係想講呢啲價值觀，想講一個人嘅生命，由朝到晚行一條路，好似隻蟻，你嘅生命無理想，無將來，你今朝早餐隻蛋就係你聽朝、後日，甚至一百年你朝早隻蛋都係呢隻蛋，基本上你已經死咗。但當你今朝起身，你決定唔再返工，走去耕田，你嘅生命就完全唔同。」秋生見著大部份香港人擔心太多，慣常活在恐懼與否定之中。「即使我哋已經生活係安全富庶嘅年代，幾慘都有個麥當奴食吓啊！」秋生特別提到戲中一句同樣終將消逝的老土道理：你有無一日擘大眼，仲因為你有手有腳而高興過？「好重要喎，亦都好簡單，你仲需要中六合彩，十條女撲埋嚟？紅遍全世界？無呢一回事。好天就盼落雨，落雨就盼好天，做人點解要同自己過唔去？」
2
「有啲人放唔低，一早黐咗線」
不是什麼恭維說話或者擦鞋，真心覺得秋生是香港為數不多真正有水準的明星、演員。他從來強調·公·民·身份，不會避開政治討論，做明星之前他先做個有血性有Guts的人，而他的人生又好像每每參與又交織香港的命途，包括他富象徵意味的英國父親、中國母親，他作為混血兒的身份認同，又曾是愛國青年參與過·保·釣·，近幾年被打入「漢·奸」、「港·獨」行列，只因為曾經發表支持「·雨·傘·運·動·」的言論。近幾年被封殺無戲開的「中年危機」，一筆秋後算帳，同樣也是香港萎靡現況的縮影，但他從沒因此收過聲。
「你可以睇清咩係人咩係鬼，人係可以幾咁卑劣。香港從來未試過咁，百幾年雖然窮但都叫順風順水，無呢啲掘尾龍，而且呢啲掘尾龍仲要係香港自己出產，佢哋唔係大陸人。大家都係喺香港一齊成長，點解有咁多掘尾龍、契弟？假設如果而家再嚟一次返去二次大戰，呢啲全部都係漢奸，戴住頂帽，叼住煙嘴，咪就係呢啲人囉。」
那麼秋生如果出生在那個年代，又是什麼人？「我一定係游擊隊，仲要瓜得最快果個，比人捉咗去審，跟住返嚟就比老婆鬧，話咗你㗎啦攞果二兩米返嚟咪算數囉，做咩游擊隊？而且我仲要唔係攞槍果個，而係送信果個，呢啲真係死得慘。就好似《明月幾時有》葉德嫻果個角色，關我咩事啫，之後就瓜咗啦。」然後他哈哈地滄海一聲笑：「我都要經過幾年去消化呢個危機，唔係個個得，有啲人放唔低，一早黐咗線。我好幸福，未痴線，未衰到貼到地，飽經風浪但啲浪又好有型咁。佛教講，萬事萬物不停變動與流動，唔等於回頭就係最好，亦不等於呢樣東西一定最好。」
3
危機不是中年獨有
早在十年前做的夢來到2018 年要搬上舞台，也經過幾番變形，各種現實原因，故事由四個保·釣老鬼荒謬絕倫的故事，變成四個中年男人各自面對「危機」，決定完成老師保釣的夢想，把他的骨灰撒在·釣·魚·台·島之上。「中年危機係講講吓吹出嚟，邊度係，其實我想講嘅，係人嘅危機。」四個夕陽戰士各自代表了一種恆常的人生危機，而危機從來不是中年人所專有。
「四個角色入面例如有個想踢波，但你跛，理想永遠實現唔到，咁究竟生命之中你可以做到幾多？呢樣關乎人嘅選擇；有個角色好恐懼，但恐懼啲完全唔存在嘅嘢，恐懼點樣嚟？源自細個阿婆做問米，成個屋企古靈精怪，所以幻想世界豐富，咁恐懼但偏偏就做警察；另一個角色家庭環境都唔錯，退埋休幾好㗎，但人生無目標，差少少打爛隻碗去掃地咁濟，咁樣先有地掃，香港唔知有幾多人無嘢搵嘢嚟搞；最後一個仲慘，老婆同個仔瓜埋，但自己呃自己，扮佢哋仲係度，幾得人驚。」過去五年神戲劇場改編不同的戲劇經典，包括《玩大電影》、《馬Equus》，《仲夏夜之夢》等，來到本土炮製的戲劇，他笑說到什麼藝術高度、美學都無。
「純粹係本土化，娛樂性豐富嘅喜劇，特別係語言部份，我對廣東話嘅能力高到唔係一般人嘅程度，差少少意思已經唔同晒，亦都有好多本土化嘅混吉位，插科打諢，全都係推進劇情之用。」戲中有一最重要的訊息，不一定需要解決你的問題，即使你做不到也不重要，最重要你肯去實踐去改變，那要用怎樣的心應對任何一種可能的結果？劇本有一句金句：「無，都得，但有就好少少。」也正是秋生的人生觀與悟道，他說得情深：
「無都得，咁講唔係代表我要接受，只係覺得唔係想像中咁差，係代表無我都生存到，但有就好少少咁囉。你話呢句幾靚。」
4
四個戰士的育成之路
「我哋成日講，劇壇其實係一個庇護工場，幫融入唔到社會嘅人搵返價值。」張銘耀（German）指著邱頌偉（雞）說：「你睇吓阿雞，佢好難融入社會㗎，」然後哈哈大笑，同時他也在講自己、馮志佑（佑）和鄧智堅（堅），或者也包括黃秋生，至少彼此找到比自己更癲更瘋狂的人，而不至於太孤獨。四個師兄弟年紀二十九歲至三十六歲之間，因為一套舞台劇《夕陽戰士》而聚首，飾演十幾歲至四、五十歲另一些他們，率先感悟夕陽心境，與自白自己的人生階段，編輯將他們各自的訪問剪輯成對話。
馮志佑（佑）、鄧智堅（堅）、張銘耀（German）、邱頌偉（雞）
堅：香港人都幾灰灰地，之前同啲大學生聊天，未畢業佢哋就已經講，唉，呢行係咁㗎啦好慘，啊？你都未做？真係一種「未畢業先衰老」嘅感覺。香港人對生活、對自己，對社會都有呢種未老先衰嘅感覺。
German：成個社會都討論緊夕陽，究竟香港係咪夕陽？新聞係咪夕陽？藝術係咪夕陽？我哋嘅前途係咪夕陽？夕陽除咗係個現象，亦都係心態，當你感覺到佢係夕陽，你唔會再願意為佢而揮霍，好似今時今日，唔好上心上身係最大嘅生存技倆，我點反對高鐵政府都係要起，我可以點做？大家都好無朝氣。呢套戲唔係想話你知夕陽係點，而係想話畀你知，夕陽唔可怕。
堅：借助一趟旅程佢哋未必改變好多，生存危機唔會因此而消失，但佢哋做咗一啲事，係為咗自己而做，對老師的骨灰撒係邊都無分別，但對自己，至少做咗啲野。好似我做嘅角色咁，佢畀真實嘅我勇敢同單純，主動帶領大家出去完成老師嘅遺願，將骨灰撒落釣魚台，現實嘅我未必做帶動果個角色，反問你，究竟做唔做到㗎唔好傻啦之類。
German：哈，就好似我嘅角色，牢騷王，第一句一定打定輸數，笑人、話人同埋窒人，但自己無諗法同建樹。講就天下無敵，但畀好多原因自己，唔好郁唔駛郁，你都傻嘅。
雞：我唔算好積極同樂觀嘅人，表現出嚟又非常唔同，果種矛盾同我個角色都幾相似，牛高馬大嘅警察但咩都驚，但爸爸做賊，而自己就係一個口水佬，好自大，守槍房但話自己有咩槍林彈雨未見過，成日問人借錢。好多情義嘅嘢佢都會記住，但行為無表現出來，各種矛盾集於一身，都幾似真實嘅我⋯⋯其實我個角色都似黃秋生本人。
號外：係？
雞：成日都話秋生外表好惡，其實佢內心好溫柔、浪漫，做好多親密嘅舉動，都係有各種矛盾，有次毛俊輝來看演出Mr Wong 緊張到面都紅曬，我個角色可以直接參照Mr Wong 本人。
German：秋生跑咗咁多年江湖，返嚟見到一班有理想又瘋狂嘅人，感覺到佢好開心。好多時候佢都好肯話你知佢嘅諗法，我試過有好Lost嘅時候，同秋生食煙，問佢，大師兄，你做咗咁多年，為咗咩？佢答我，唔知㗎，一個個階段。跟住佢話，恭喜你啦，你終於踏入做一個好演員嘅第二個階段，好嘅演員第一步會質疑所有，但你唔駛質疑自己，你已經做緊，繼續思考落去，你會搵到。但我好窮點算？之後佢暗啞底介紹人畀我認識，我覺得好Sweet。
號外：馮志佑，你幫《夕陽戰士》創作咗一首主題曲？
佑：係，一開始睇《夕陽戰士》份劇本，令我有一種好悲嘅感覺，感覺好似走唔出困局，但唔係，果班人幫佢哋老師完成夢想，其實已經有Action，做緊一啲從來無諗過做嘅事。歌詞入面我最鍾意呢句，「日落有什麼可怕，我就企在西山下」。「就」字要大聲啲，用力啲，係代表咗一種態度。
German：我2000年入行做公開演出，2010開始由PIP劇場全職戲劇演員走出嚟，自己搞劇團，發展到成為香港最年輕嘅劇團三年可以Manage到沙田大會堂咁大嘅劇場。我覺得自己慢慢由學徒，變成去到一個搵自己嘅舞台嘅階段，幕後、電視、電影或者甚至劇場老闆都代表唔同嘅舞台，今年我離開咗自己嘅劇團，想搵自己真正嘅舞台。
堅：套戲講到危機，我嘅事業未到黃昏、夕陽，但要停下，思考點樣改變。近年點解我轉營去電視？因為覺得舞台事業好黃昏，唔知道可唔可以再繼續發展，演繹點樣有突破，其實無觀眾人數支援你嘅劇本都係問題。中間我自己都經過許多挫敗，搞劇團蝕咗一大筆錢，現在仲還緊債，究竟仲有無得搞呢？當影響埋自己生活，揹上債務，係咪純粹自High？入電視呢條路都好迂迴，機緣巧合下舊年正式加入TVB。
雞：如果我有英雄情義結，就會好似German佢吔咁搞劇團，佢哋有一種感覺要帶領人，我宜家開始都有少少，想主動做多一啲。以前我比較自我，鍾意就做，唔鍾意就唔做，而家可能成長咗，思考做唔同嘅嘢對自己有咩幫助，宜家做人負責任一啲，對家人、對朋友、對師兄師姐甚至下一輩師弟師妹。最近我做咗啲無諗過會做嘅事，我走去教書，教藝人做戲，多同其他人分享自己的經驗，呢個係社會責任。需要嘅時候就做一個領導者，呢種先叫男人。
堅：三十幾歲有咗一啲人生閱歷，同時都有體能，呢段時間最應該把握幕前，四五十歲身體狀態再唔同少少，可以專注其他方面，導演或編劇，去到四、五十歲都未遲。至於咩平台，我就非常開放，唔應該畀自己太多限制，對演員嚟講，舞台、電視電影其實咩平台都可以。
佑：你問我宜家係咩人生階段？我仍然係摸索階段，唔似其他人搞自己劇團，或者接觸唔同媒介。佢哋係成熟期，而我屬於成長期，做咗劇場七年，呢一刻我想專注劇場，仲有好多嘢可以學習。
5
「日落有什麼可怕，我就企在西山下」
佑：點解我戲劇界唱作人嘅身份咁入民心？我都唔知，我阿爸好鍾意唱歌，佢唯一嘅玩樂就係唱k，可能畀佢影響，但我屋企窮，我同阿爸阿媽講想學琴，但窮唔畀學，可能壓抑下來，一直好想接觸音樂，結他我係自學，啲人見我成日玩結他，以為我好叻，其實唔係，我玩結他以感覺行先。我人生第一首自己創作嘅主題歌，係幫方俊傑執導的《十二夜》（佢都係《夕陽戰士》嘅導演），果次之後大家就認定我識作歌，今次我就作咗《逆風》呢首歌。
號外：首歌對套戲起咩作用？
佑：我覺得係加咗個希望落去，一開始諗歌詞係想連繫返套戲，其實啲歌詞更加似劇本嘅延伸，一開頭講咗自己角色嘅悲慘問題，因為生活或者現實問題，放棄夢想，去到歌曲後半段，原來唔係，其實我哋要有希望，要去做呢件事。一開始睇咗個劇本，但《逆風》這首歌玩咗Contrast，係㗎，你去啦衝啦，有啲似Rubber Band果首《發現號》，即使我錯過了也好，我仲有未來可以前往，令人聽完有一種滾動嘅感覺。
©City Howwhy Limited
版權所有，未經授權請勿以任何形式轉載或使用
