「我估我唔係一個好standard「男子漢」，因為我長唔大，或者咁講，我唔願意長大。」
藝術家章柱基（Kila），大男孩一名，近日在忙個人展覽《Twinkle Twinkle Little guys》，一個個道路警示燈被他改裝後充滿童趣，來觀展的大人細路都快樂非常。「人不要太成熟，要保持好奇心，有勇氣反叛，有時間發夢。」藝術家簡介裡短短22個字，似乎總結了Kila至目前為止的人生態度。
已過而立之年的他，人人看不出來，只因得天獨厚的孩子臉。「我細個讀天主教學校，唔知點解好記得《聖經》入面有人講過，大個嘅人應該嘗試將自己變返做小朋友咁。」他不是教徒，卻一本正經地搬出《聖經》大道理來。
男人都可以不成熟
那麼，Kila 口中那種「不太成熟的男子氣概」是怎樣的呢？「都好受流行文化影響㗎，細個時睇好多日本漫畫，啲男主角其實都係一堆小朋友，幾歲到十幾歲都有，中意周圍去冒險咁。要表現嘅唔係雄赳赳嗰種man，而係日本人好信奉嘅『熱血』！好似《one piece》咁，入面啲角色都唔會長大，佢哋性格好純真、珍惜友情、熱愛生命、用熱血去維護信念……即是話，唔係敦起個款就男子漢嘅，呢啲故事對我影響都好深。」
細個時除了漫畫，對得最多就是爸爸，提到爸爸，他劈頭就說，「嗯……我阿爸都係一個唔太成熟嘅人。」原來章爸爸是個游泳健將，早年加入成為冬泳會成員，即使八號風球都堅持游早水；人好動，愛駕電單車周圍去，也愛儲物，珍藏了很多黑膠碟，多得曾經借出予廣東歌展覽用，非常威水，「但呢啲都係好唔成熟嘅表現，係咪吖？」
Kila又補充，「你話佢係咪唔man、個人好CAMp咁呢？又唔係喎！佢好鬼多鬚根㗎喎！」從他眼睛裡能看出他對爸爸有著一種景仰。
爸爸與小明都是真男人
章爸爸以前做製衣，沒有什麼交際應酬，所以為人較踏實，也慣了直腸直肚。不像後生一輩，說話要得體漂亮，將語言偽術內化成人際技能。
「阿爸有嗰句講嗰句，我啲性格就似足佢喇。」Kila 坦言自己份人都幾口沒遮攔，可是不同於爸爸的年代，從事創作根本沒法逃避人際關係；有人斥他不夠世故，有人要他做人圓滑點。天生反叛底的kila，因此著手創作小明這個角色。
初面世的第一代小明穿著track suit、短褲仔，表情又笑又喊，代表他的率性，「小明可以話係集所有我嘅缺點於一身嘅人。」短短三年， kila 發覺直率性格唔work，得罪人多，於是就推出新小明。新小明依然穿短褲仔，口袋裡有槍、有錢，似是對外處處防備；更戴起一副畫上眼睛的眼鏡，掩飾原本的表情，「我想話，你改變唔到原本嘅我，但我願意為生活而偽裝。」從此，kila將保持真我的任務就交給小明。
「喂好正！呢個玩具滿足哂我所有願望，有激光，可以轉，又有聲，滿足哂！」kila話鋒一轉，聽得我一頭冒水。原來攝影師拿起了kila的玩具槍把玩，「呢把槍喺台灣玩具展覽場館旁邊買，然後我成個晏晝就同小朋友對槍。」作勢四周掃射之後，他回過神來，「死喇，講到邊？」
我想起，Kila喜歡的藝術家奈良美智曾經在著作中寫道：「我要向那些裝腔作勢的傢伙，豎起中指開火。」
奈良美智也是個成功的Kidult
「你好難知道一個artist係咪一個好男人，因為你唔認識佢為人。我認為作品某程度都好反映一個人嘅內心，奈良美智一定係不願變老嘅人，大家都好受落。所以我相信孩子氣唔係缺點，係風格。」毋庸置疑的是，Kidult型男性對不少女性來說都很吸引，不但好玩，偶然爆發的孩子氣又會令人忍不住想要照顧。不過年紀一大，即使是電影裡的張志明，到頭來都是要步向成家立室、養妻活兒的「成熟度」，余春嬌才會收貨。kila 又是否認同男人成長只此一途？「兩睇啦，女友識得欣賞我、照顧我，雖然我有時無擔帶，唔隱陣，又無錢……當然最後可能會頂我唔順走咗。」他哈哈大笑，接續道：「得一個方法可以解決：有一日我飛黃騰達囉。」
女友是任職商台、藝文圈子一定認識的主持人急急子，同屬藝術創意人，Kila覺得可以跟女友一起到不同地方參加藝術祭，一同體驗新奇物事，是一種幸福。「如果我係隱陣型男人，根本唔可能有呢種生活。」進行中的《Twinkle Twinkle Little guys》展覽，也是出自二人手筆，他們將街道常見的道路警示燈化身成不同角色的「little guys」，然後放在香港甚至外地城市的不同角落，這個為期30天的小習作獲邀到商場藝廊裡展出，被圈內好友笑稱為「放閃」之作。
「不過喺香港做呢種工作，我都唔肯定係咪可以一直繼續落去。」Kila稱展覽過後隨即又要去日本的藝術工作室研習，問他怕不怕Long-d，他說比較怕窮，「所以身為一個港男，尤其係創作人，一定要記住『慳』－ 呢個簡直就係我而家做人嘅法則。」
