踏進陳木勝位於火炭工業區的辦公室，看到牆上掛著的《保持通話》（2008）電影海報，我的回憶翻滾，思緒飄到約9 年前。
記得當年《保》上映後，陳木勝曾經應邀擔任浸大傳理系講座嘉賓，於蒙民偉廣場跟眾多大學生，包括還是大二生的我，分享多年來的影視創作心得。席間，被問及以合拍片《雙雄》（2003）初探內地市場的狀況，他的神色顯得既期待、亦見困惑，讓人好奇：這場探險將如何發展？
歲月流轉，重提舊話，身經百戰的陳木勝，想法不再迷惑，「北上創作、揣摩文化，絕對大開眼界。講人力物力、空間優勢，香港相對輸蝕。論人文情懷、思想自由，我地始終佔優。經歷呢段日子，我學習好多，亦更加肯定：唔介意北上觀摩，但唔會全心投入，基地始終係香港。」個性溫婉的他，不認為凡事要二元撕裂，希望各取兩地創作的優點、互相各自之不足，從而拓闊香港電影的想像與技藝，像他的科幻合家歡新片《喵星人》就是一場跨越南北以至韓國的創作實驗。
浸淫於香港文化的快樂童年
「廣闊的宇宙之中，住著一種外星生物，名叫『喵星人』⋯⋯」收到陳木勝新戲文案時，有點訝異。沒想到拍了幾廿年警匪動作片的導演，有一天會放下最擅長戲碼，跑去挑戰如此童話向的題材。
對於外界的疑問，陳木勝了然於心。入行近30 年的他，直言自己雖然由 1990 年《天若有情》、到 1996 年《衝鋒隊─怒火街頭》、《特警新人類》系列、以及和成龍合作的《我是誰》﹑《新警察故事》等，一直善於運用「英雄、美女、飛車、打鬥、槍戰」等元素創作，但他不止關心官能刺激，還重視有否透過作品為人帶來關懷和意義，「我無讀過大學，唔係科班出身，只係由電視台場記再轉入電影圈做導演。但我睇戲唔淨係諗娛樂，都相信電影係一種傳播媒介，有社會責任、基本原則和規矩。」
想法全受成長環境薰陶。自稱「香港仔」的陳木勝，憶述童年環境，科技不算先進、資訊不太流通，家住樂富的他閒來無事就會和同學，到啟德遊樂場看戲，「當時戲院的嘉禾及邵氏院線，可以睇平戲。另外的麗宮戲院，就專播二輪片，大戲、中西片都有。」熱血男兒如他，最迷邵氏武俠經典，「狄龍、姜大衛係我的偶像！喜歡張徹《獨臂刀》。」日頭看不夠，晚上他還會讀武俠小說，「夜麻麻匿在被竇、開電筒追金庸的書，為俠義情懷感動到喊⋯⋯所以全家無近視，得我要戴眼鏡囉。」他回味說。
SOMETHING LARGER THAN MONEY
別以為童年往事無關痛癢。生命裡很多事，就是由你還是孩子時，最初遇上的人與事奠定。這些談道德、講情義的文藝作品，塑造出陳木勝沉穩、踏實的個性，也建立他對香港文化的認同、對創作的堅執，幫助他走過諸如82 年中英談判開展、97 問題的困擾與焦慮，緊接回歸後CEPA 簽訂、香港電影由盛轉衰、影人北上等階段，依然守著最大宗旨：即使做的是商業電影，也別忘記它是人與時代的溝通橋樑。創作者必須盡本分，尋找影像的藝術價值，別單純視之為生財工具。
「拍戲多年，有咩心痛？就係見人人沉醉夢中。呢幾年大家抱怨，點解人才北上，或跑到泰國、韓國，唔留守香港？其實佢哋未必唔想留，而係留唔到。香港唔係無高手，係市場容納唔到。以前市道好景，好多人拍戲賺大錢，但拎去炒樓、投資、吃喝玩樂，都唔會回報工業，例如開特效公司、培育人材、試新片種等，令市場再壯大一點。大家比較短視，要嗰樣先去搵嗰樣，無宏觀計劃應付隨時出現的危機。好喇，有錢的人唔做，有心做的又無錢。唔想被淘汰，唔少人要北上、搵其他出路，業界咪斷層。」陳木勝娓娓分析。
北上的自由與不自由
是循環，也是共業，圈子中央人無一倖免。就算本身沒打算北上、愛於香港創作的陳木勝也得思考前路。有見香港創作的資源局限，也為汲取更全面的製作經驗、了解華語影圈現況，2013 年，他以合拍片《雙雄》為試點，展開不同規模的跨地合作，挑戰從未嘗試的創作類型，譬如主攻視覺特效的《全城戒備》（2010）、由少林寺贊助與正式官方授權拍攝的《新少林寺》（2011）、任性挑戰古裝武俠，大膽融入喜歡的黑澤明和美國西部片元素，耗時5 個月建造一座20,000 平方米、可容納2,000 餘人的城鎮，拍成《危城》（2016）等。一步挨一步，尋覓機遇、打破限制。
「北上幾大開眼界。內地MANPOWER 大到嚇死你，拍大場面閒閒地CALL 到一萬幾千人，香港邊得？而且，內地有提供聲樂學習、外語培訓的少年宮等，好多美藝、製作人材基本功紮實，即使實戰經驗略淺，但稍為勤力就追過香港人。加上早年多香港影視人北上，將香港的拍攝、製作及執行技術引進內地，間接訓練新一代內地電影人，好似武術人員，唔少青年自細跟成家班、洪家班等學藝，依家獨當一面。仲有，香港難搵演員，來來去去某幾個，內地地大脈博、多影視畢業生，夠專業、選擇多。視野上，內地都追求國際化，譬如近排火紅電視劇《人民的公義》，聽講就係參考美劇《HOUSE OF CARDS》格局。以上的條件，都提供到好多人力、物力、人脈上的幫忙，俾我哋試到某些香港拍唔到的片，例如時代戲、歷史劇等。」陳木勝分享。只是「大開眼界」，有正面也有反面。「內地有優勢，但論思想及創作自由，始終未及香港。最簡單，我拍戲首要人身安全，不過內地人幾忽略工業安全守則，唔夠自律性。我試過鬧人，唔係發脾氣，真係擔心有人受傷。另外，我叫香港演員向內地演員學習，但有一樣千萬唔好學，就係架子。自問好彩，未遇過麻煩，之但係唔少朋友捱緊苦。我聽過的個案好誇張，例如新演員一部戲收過億片酬。嘩，大佬，廿零歲，一年搵幾億！邊個導演、編劇？理得你啦。另外，唔少新一代明星簽約，要求做埋投資方。喂，你係我老闆，點樣叫你做戲？唔係講笑，遇過兩者衝突，真係犧牲編導、保演員，因為後者檔期難夾。呢個問題好嚴重，直接影響創作和製作，唔明點解行內人、經理人公司、電影公司唔管，反而政府試過公開警誡。」
講到政府，他續說，「想過開大陸槍戰片，但內地市區拍攝好多限制，譬如街頭唔准見人拎槍，唔可以煙火爆破，點拍？我同電影局傾過，現階段都未開放到批文。」陳木勝輕嘆，若然內地影視業的門檻或尺度再開闊點，說不定可以催生更多獨特和有趣的作品。「我體諒。始終開放無耐，尚要時間摸索，或者多十年八載，可能有進步呢？」
別人北行 我卻不行
「不過等十年八載，我唔知有無心力喇。哈哈。」滿頭白髮的陳木勝笑說，話就話光陰似箭，連多年前聽TALK 的學生，轉頭都長大成為記者，回來跟自己做訪問、再聊創作的故事，然而他自問老了，沒有衝勁瞓身北闖，「十幾廿歲，我一定同你講：北上去闖一番事業！甚至相信自己必然有成。因為大勢所趨、市場又廣，無可能容納唔到，香港人又靈活，一定好快掌握。但係，我依家試完，自問係學到新事物，不過情感唔投入。就算中港做事方式接近，但觀點和視野、對情感的『真』始終理解唔同。一把年紀，唔想再學遷就老闆、配合演員，做太多無謂妥協。」況且作為顧家（又戀家）的丈夫和父親，他寧願把寶貴時間留給最愛的人，「可以返內地做嘢，但定居？絕對唔會。除咗拍戲，盡量想留在香港。花太多時間工作了，得閒都想同家人去下旅行、飲飲食食，享受家庭樂。」陳木勝解釋，這就是將辦公室設在火炭的因由，「我住沙田，返工10 分鐘，幾方便。」
看這位FAMILY MAN 講起家人的冧樣，我會心微笑，想通何以2015 由他監製的《五個小孩的校長》，還有將於暑假推出的《喵星人》多了濃濃溫情。或許視電影為心靈教育的他，想跟子女、其他香港小朋友分享作品？「都係。影視威力入心。所以我偏好大眾化，唔想三級、暴力，血腥點到即止。即使我拍警匪片，都會借正反派講公理、俠義。」今次針對孩童群眾的科幻片，他也想過度過，「《喵》表面講外星喵侵略地球，好似搞笑過癮？唔止。我想通過主角犀犀利諗住由家開始搞破壞，下一步就滅城、滅國和再滅地球，點知任務失敗，從中帶出一個家只要有愛，即使面對變化和風雨，都可以攻而不破。」陳木勝以跟小孩說睡前故事的語調，繪形繪聲地模仿貓主角動態，跟我解說想法。
團結是未來的出路
戲內講家庭有愛就可攻而不破，戲外目睹香港近年的世代、身份撕裂，陳木勝不無痛心。他知道一力之力難以改變世界，但至少個人創作上會求同存異，盡量汲取兩地的可能性，也互補各自的不足去完善作品，而不想用割裂思維去劃分你我，或刻意排他。因為紛擾中，互相支撐、團結創作，是當下更重要的事。「譬如電影開得成，就全靠古仔（古天樂）SUPPORT。資金、資源之外，最重要佢願意信我、信件事。拍《寶貝計劃》（2006）時，佢已經話我貪玩好笑，鼓勵我拍喜劇。但受環境所限，十幾年前，想拍一部單車戲，講4 人車隊。（類似《破風》？）係。當時老闆、業界認定『你應該拍警匪』於是BAN 咗。等到今日，儲夠人脈、資金、又有古仔推一把，先試得到。」
遲來的機遇，讓陳木勝更用心，希望能為自己、也為同業提供創作的可能。「雖然呢部係合拍片、亦選用如馬麗、黃星羱和劉楚恬等內地演員，但你睇真啲，台前幕後班底仍然好多香港人參與。因為難得做一部科幻喜劇、嘗試新製作，我希望多啲本地人參與，一齊善用現時爭取到的資源拍戲。譬如客串或配角等，好多本地搞笑高手，有鵬哥（盧海鵬）、草蜢、祥仔（阮兆祥）等。或者香港電影愈拍愈少，大家都『餓戲』，個個一呼百應，唔係為一兩日片酬，真係來支持、發揮，大家每日都玩得好開心，自己都感受到業界的團結。證明有危就有機。或者去到絕路有彎轉？」
技術上，陳木勝亦信任本地製作公司的能力，願意和他們一起探索特效領域，「全片約2,000 多個特技鏡頭，最難解決係犀犀利的毛髮問題，香港得一兩間公司敢做（編按：分別為「發輝工作室有限公司 」FATFACE PRODUCTION LIMITED 及「悟童數碼特效設計有限公司」 DIFFERENT DIGITAL DESIGN LIMITED）。開頭都擔心，但依家出來效果唔錯。我覺得你相信香港得，其實係有機會做到。大前提，你要俾足夠時間，仲有能夠讓他們生存的價錢，未係貴到荷李活咁，但唔可以太便宜，必須合理。因為每一格、每一秒都係心血和錢，尤其RENDERING 部份，個價位最貴、時間亦多，今次佢哋都處理得好好，令我好放心。如果有心要做好，我覺得要尊重佢哋，付出合理待遇。」
外面有個大世界等著你
然而特效工序太多，現時本地全動畫劇情長片製作經驗尚淺，難以單靠一間公司完全承包，部份內容不得不分拆，另外再由海外專材協力，「要做得精細，基本上每一格菲林都要做後期，唔想做死晒香港的技術人員，亦要睇數做人，於是安排一間韓國特技公司處理（編按： 4THCREATIVE PARTY COMPANY LIMITED），大家各按主角犀犀利的頭部、身體和全身CG 三部份分開製作。影片頭十分鐘，就係由韓國那邊做，呢間公司專門做動物，前作有韓片《TIGER》，全隻老虎都係3D，效果好真。當香港好穩陣，跟住參考圖做，仲要拍綠布景時，佢哋負責做的太空貓，全憑幻想，唔需要拍綠幕，已經做到型英帥靚的SUPERHERO 感覺，好IMPRESSIVE。」
跨中、港、韓的合作，令陳木勝若有所思，「經歷內地探索、香港影圈變化，以及《喵》，我想到一個問題，其實影視領域裡，存在的競爭唔止得中國和香港咁狹窄，譬如你睇韓國和泰國的技術、創意，呢幾年冒升幾快，外國又有NETFLIX 等，改變觀影的模式，例如近來我都同步追緊《HOUSE OF CARDS》和《FARGO》，或睇短片，少睇劇情長片。我體會到觀眾的口味、需要在轉變，相信一個新的娛樂世界出現緊。香港真正要面對的挑戰有太多太多，我哋的視野係咪應該放得更遠呢？」
